ኣብዘን ኽልተ ፍቕድታት እዚኣተን ዝተገልጸ ታሪኽ እምነት ደቂ እስራኤል ካብ መጽሓፍ ኢያሱ ወዲ ነዌ ዝተወስደ እንኪኸውን፥ ዋና ተዋሳኣይን መራሒን ሕዝበ-እግዚኣብሔር ባዕሉ ኢያሱ እዩ። ኢያሱ ንሙሴ ተኪኡ ንሕዝቢ እስራኤል ናብ ምድሪ ከነኣን ኣቢሉ ኣብ ዚመርሓሉ እዋን ንተጻረርቲ ሕዝቢ ኣምላኽ ብእምነት ኣጽነተ። ነታ ጽንዕቲን ዕርድቲን ዓባይን ኸተማ ኢያርኮ ብዘይ ውግእ፥ ጠሓሒሱ ክኃልፋን ምርኮ ኪመቅልን ዘብቅዖ፥ ኃይሊ እምነትን ምስጋናን እዩ ዚነበረ።

ብብዝኁን ኃይሉን ዓቕሙን እቲ ብኢያሱ ዚምራሕ ዝነበረ ሕዝቢ እስራኤል ንቀጽሪ ኢያሪኮ ኬፍርሶ ክእለት ኣይነበሮን። እቲ ኣብ ውሽጡ ዝነበረ ኃይሊ እምነት ግና ንዝኾነ ይዅን ጸገምን መሰናክልን ጠሓሒሱ ኪኃልፍን ንዅሎም ጸላእቱ ኬጥፍእን ኣኽኣሎ።

ኣብ ውሽጢ ከተማ ኢያሪኮ ተቐማጢት ዝነበረት እታ ኣመንዝራ ረኣብ በቲ ዝተዋህባ ጸጋ እምነት ነቲ ኪመጽእ ዝነበሮ ዕንወት ከተማኣ ኣቐዲማ ኽትርኢን ምስ ሕዝቢ ኣምላኽ ኽትጽንበርን ከኣለት። በዚ’ውን ካብ ጥፍኣት ንርእሳን ቤተሰባን ኣድኃነት። እምነታ ካብቲ ጥሒላቶ ዝነበረት ሕይወት ከም እትወጽእን ምስ ቅዱስ ሕዝቢ ኣምላኽ ከም እትቝጸርን ገበራ።

እምነት፥ ነቲ ዘይከኣል ከም እትኽእሎ ትገብረካ፣ ካብ ኃጢኣት ናብ ጽድቂ ከም እትሰጋገር ትገብረካ፣ ካብ ጥፍኣት ናብ ትርጉም ዘለዎ ናብራ’ውን ተሰጋግረካ።

ጸሎት፡- ኦ እግዚኣብሔር ኣምላኸይ ካብቲ ተመላሊሱ ዜውድቐኒ ውዱቕ ልምድታተይን ፈተናታተይን ክርሕቕን ምሳኻ ጠቢቐ ኽነብርን ዜኽእለኒ ሰማያዊ እምነት ሃበኒ። ነቲ ኣብ ቅድመይ ከም ቐጽሪ ኢያሪኮ ዝተገተረ ጸገማተይ’ውን ብኃይሊ እምነት ከም ዘፈራርሶ ግበረኒ። ኦ ኣምላኸይ ንስኻ ወትሩ ምሳይ ከም ዘሎኻን በቲ ንስኻ እትህበኒ ጸጋ’ውን ንዅሉ ከም ዝኽእሎን ዝሰግሮን እኣምን እየ። ኣሜን።     

እዞም ጀጋኑ እምነት እዚእቶም፥ ብዛዕባ ዝሓለፈ ሕይወቶም ኮነ ብዛዕባ እቲ ኪመጽእ ዘለዎ፥ ከምኡ’ውን ብዛዕባ እቲ ኣብ ኢዶም ዝነበረ ህሉው ጊዜ ብዘይካ ብእምነት ብናይ ሥጋ ትውክልቲ ይምርሑ ስለ ዘይነበሩ፥ ብሕይወቶም ንኣምላኽ ኣኽቢሮሞን ዕዉት ናብራ’ውን መሪሖምን። ኣምላኽ ድማ ብወገኑ ንኣኣቶም ኣኽቢርዎም።

ንባብ፡- መልእኽቲ ናብ ዕብራውያን 11፡1-3

ኣብዛ መልእኽቲ’ዚኣ እንታይነት እምነት ብሓጺሩ ተገሊጹልና ይርከብ። እምነት ምስ ተስፋ ትዓዪን፥ ካብተን ኃሙሽተ ናይ ስምዒት ሕዋሳትና ወጻኢ ንዘሎ ብዓይኒ ዘይርአ፥ ብእዝኒ ዘይስማዕ፥ በእዳውካ ዘይድህሰስ መንፈሳዊ ኵነት ብርግጸኛነት ከም እትፈልጦ ትገብረካን። ካብቲ ግዙፋዊ ዓለም ክንየው፥ ብሥጋ ዘይብጻሕ መንፈሳዊን መለኮታዊን ሕይወት ከም ዘሎ ብዘይ ገለ ጥርጥር ኣረጊጽካ ከም እትርኢ ተገብረካ።

ብዘይካ እምነት፥ ነመጻጽኣ ዓለም ኮነ ንኣፈጻጽማኣ ኽትርድኦን ኽትፈልጦን ኣይከኣለካን። ንናይ ወድ ሰብ መሠረታዊ ሕቶ፥ ማለት፥ “መን እዩ ዝፈጠረኒ፧” “ናበይ ኣቢለ እየኸ ዝጐዓዝ ዘሎኹ፧” “መወዳእታ እዚ ዅሉ ዓለምከ እንታይ ኮን ይኸውን፧” ንዚብላ ተረርትን መሠረታዊ ዝኾና ሕቶታት ብእምነት ጥራይ ኢኻ ሓቀኛን ምሉእን መልሲ ኽትረኽበለን እትኽእል። ስለዚ፥ ንፈጣሪኻ “ኦ ጐይታይ ጸጋ እምነት ሃበኒ” ወይ ከኣ “እምነት ወስኸኒ” ኢልካ ምልማን ባህርያዊ ጸሎት እንኪኸውን፥ ብግድን እውን ዝኾነ ሰብ ኪጽልዮ ዚግብኦን ጸሎት እዩ። ብዘይ እምነት፥ ጕዕዞ ወድ ሰብ ኣቕጣጫ ዝሰሓተን ኣልቦ ዕላማን ኾይኑ እዩ ዚተርፍ።

ንጸሊ፡- ኦ ፈጣሪየይ ዝኾንካ ኣምላኸይ፥ ንኣኻ ኽፈልጥን ዕላማ ሕይወተይ ኽርዳእን ፍሉይ ጸጋ እምነት ክትህበኒን እልምነካ ኣሎኹ። ናይ ሕይወተይ ጀማርን ፈጻሚኡን ንስኻ ከም ዝኾንካ ኣጸቢቐ ኽርኢን ከምቲ ናትካ መደብን ፍቓድን ምእንቲ ኽነብርንሲ፥ ብእምነት ከም ዝዓቢ ግበረኒ። ኣሜን።